Концертна промоција на Mammoth & Yashem во Ла Кања

[ ]

Вечерва во кафе барот Ла Кања во старата скопска чаршија со почеток во 21 часот ќе се одржи концертна промоција на најновото остварување на скопскиот соло артист Mammoth & Yashem.

MY_LK

Mammoth & Yashem – Atom EP е единаесеттото издание на независната музичка етикета Шарла. Се работи за електронски алијас на Ненад Тонкин, некогашниот член на популарниот поп колектив Bei The Fish и неговиот втор издавачки соло зафат. По концептуалното издание ,,Музика за неснимен краткометражен филм’’ од 2013 година за Шарла, враќањето на Тонкин е во сосема различен манир што не е неочекувано од овој познат музички патник.

Атом ЕП е вистински mood changer во чудната скопска пролет, интелигентен електронски колаж кој ќе ве однесе кон почетоците на овој жанр во 70-те кога аналогните соништа така луцидно ја опишуваа иднината која никогаш не се случи. Сепак, ова е многу повеќе од ретро-футуристичка авантура, Mammoth & Yashem успешно го поместува расположението кон нежно џезиран сонлив пејсаж во My Birthday is и секако електро-краут бравурата The first step is која е tour de force на ова издание. Поискусните техно фанови сигурно ќе ја „сместат’’ Molecural во прочуените електронски компилации од раните 90-ти преку кои тогашните генерации се хранеа со овој музички став. Како гостинка на изданието во две од четирите нумери се појавува гласот на актерката Наташа Петровиќ во вид на семплирани реплики од новиот театарски проект на режисерката Билјана Радиноска.

Mammoth & Yashem – Atom EP ќе може бесплатно да се преземе во наредните седум дена од bandcamp страната на Шарла.

 

19.04.2018

„Кралот на Бетајнова“ режија: Милан Нешковиќ, улоги: Ненад Јездиќ, Војин Ќетковиќ, Никола Ракочевиќ, Милена Живановиќ, Анѓелка Симиќ, Небојша Миловановиќ, Михајло Јанкетиќ, Мина Обрадовиќ   Цанкар ...

09.04.2018

Трите термини на големите холивудски студија за пласирање на своите нови блокбастери се Велигденските празници, летото и Божиќните и Новогодишните празници. Првиот од нив мајсторски ...