The Love Witch

режија: Anna Biller

[ ]

Хоророт често бил начин да му се погледне на табуто во очи. Во ера кога политички некоректните потези се дочекуваат на нож, хорор филмовите стануваат прибежиште на оние кои со драга волја би пуштиле малку крв. Како и одличниот Get Out, кој го согледува латентниот расизам кај оние најлибералните, The Love Witch ја карикира половата (не)еднаквост со тоа што им го позајмува машкиот поглед на феминистките. Глетката е ем секси, ем длабоко вознемирувачка.

TLW2
Ретко кој ќе остане рамнодушен на убавината на Elaine (Samantha Robinson), главната протагонистка на The Love Witch. Стереотипот веќе го знаете. Во film noir, таа би била femme fatale која ги заведува мажите и остава смрт зад себе. Во документарците таа би била богомолката која одвај чека да заврши парењето. Кај Buñuel, таа би била отелотворение на Catherine Deneuve. Но што би можела да биде во хорор филм од 2016? Па вештерка, нормално…
Оваа вештерка пред да се фати за занаетот веројатно одбранила магистериум по феминистички студии и може да рецитира трактати за женската експлоатација и за либертинизмот. Нејзините жртви не мораат да бидат убиени. Наместо тоа, доволно е на нивниот машки поглед да им се возврати со подеднакво експлоатирачки женски поглед. Штом Elaine им покаже на алфа мажјаците илузија на идеална жена спремна да ги исполни сите нивни фантазии, тие одеднаднаш стануваат мачиња што предат до смрт свиткани во скутот на господарката. На гледачот му останува да одлучи дали ќе бара виновник за експлоатацијата, или ќе се препушти на естетско уживање во облините, мускулите, крвта и месото што го исполнуваат секој кадар на The Love Witch.
TLW3
Филмот не е толку страшен колку што е непријатен и субверзивен. Полн е со стилизирани, кокетни ликови во кои ги препознаваме нашите најдолни инстинкти. Оние што пораснале со италијанските хорори од 70-тите, ќе ги препознаат во Love Witch потписите на Argento, Bava, Fulci и редица други машки автори кои плачат за субверзија, бидејќи во нивните филмови визуелниот елемент најчесто ја засенува суштината на жената. Режисерката Anna Biller гордо ја носи својата мантија на феминист, иако во приватниот живот е во врска со Robert Greene, автор на контроверзната The Art of Seduction и самопрогласен освојувач на жени. Како и неговата креаторка, филмот The Love Witch ужива во судирот на спротивностите, исфрлајќи по пат искри што го стимулираат телото и го ослободуваат умот.

Кога денот немаше име
режија: Теона Стругар Митевска

10.10.2017

Изминативе денови се крена многу врева и прав околу новото остварување на Теона Митевска, „Кога денот немаше име“. Како фино маркетиншко надоврзување на фокусот врз ...

Истребувач 2049 | Blade runner 2049
режија: Denis Villeneuve

07.10.2017

Еден ден по најдолго исчекуваната премиера во мојот живот седнувам пред компјутерот, го пуштам на Јутјуб саундтракот од филмот за да ме понесе атмосферата на ...