„Мојот превртен свет“ со награда на SEEfest

Документарниот филм „Мојот превртен свет“ на креативното дуо Петра Селишкар, режисерка и Бранд Ферро, директор на фотографија, во ко-продукција меѓу Македонија, Словенија и Хрватска, на годинашното 12. издание на Фестивалот за филмови од Југоисточна Европа (SEEfest) во Лос Анџелес се закити со две награди: Специјална награда од жирито за најдобар документарен филм и награда за најдобра фотографија во документарен филм.

MPS

Фестивалот за филмови од Југоисточна Европа е основан во 2002 година во Лос Анџелес, чиј што концепт е да ги промовира филмовите од Југоисточна Европа, особено филмови што ја раскажуваат пошироката приказна за неа. Фестивалот на овој начин се обидува да ѝ ги отвори вратите на американската публика кон овој регион, промовирајќи ја културната различност на Југоисточна Европа преку годишна презентација на филмови и организирајќи конференции и ретроспективи за студенти и филмски работници со цел да се создадат можности за културна размена меѓу Јужна Калифорнија и Југоисточна Европа.

Документарниот филм „Мојот превртен свет“ е приказна базирана на музика со песните на култниот словенечки актер, режисер, поет, писател и кловн Фране Милчински – Јежек. Во продукција на Петра Пан Филм Продукција, филмот е направен како македонско-словенечко-хрватска копродукција. Во музичкиот сегмент на филмот настапуваат и македонските музичари Тони Китановски со оркестарот „Черкези“, како и групата Bernays Propaganda.

Македонската премиера на документарниот филм „Мојот превртен свет“ се одржа на отворањето на седмото издание на Фестивалот на креативен документарен филм МакеДокс, на 20 август 2016 во Скопје.