Музиката од документарниот филм „Мојот превртен свет“ на плоча

11 јуни 2019 Ап(о)тека МКЦ

Промоцијата на саундтракот од музичкиот документарен филм „Мојот превртен свет“ (Moj narobe svet) ќе се одржи на 11-ти јуни во музичката продавница „Ап(о)тека“ при Младинскиот културен центар во Скопје. Настанот ќе почне со проекција на филмот „Мојот превртен свет“ во 19.30 часот во киното „Фросина“, по што ќе следи промоцијата на винилното ЛП-издание со саундтракот од филмот на платото пред МКЦ.

Станува збор за саундтрак од музичкиот документарен филм „Мојот превртен свет“ (My World is Upside Down), во режија на Петра Селишкар и во продукција на Petra Pan Film од Словенија, ППФП-Македонија и Restart од Хрватска. Материјалот е достапен на винилен ЛП носач со додатен 7” винил, како и во дигитални формати, кој го продуцираше издавачка куќа PDV Records од Хрватска.
Во филмот се испреплетуваат музичките изведби на актуелните водечки алтернативни музичари во светот, кои ги реконструираат песните на „словенечкиот Чарли Чаплин“, универзалниот уметник Фране Милчински-Јежек, со неговата неверојатна архивска граѓа.Изданието излезе заради долгогодишната плодна соработка на полето на креативната документаристика помеѓу филмските продуцентски куќи Petra Pan Film од Љубљана, Restart од Загреб и ППФП од Скопје во соработка со музичката издавачка куќа PDV од Пула.
Во филмот водечките алтернативни музичари во светот денес ги свират песните на Јежек и истите се испреплетуваат со архивската граѓа од 1960-те до 1980-те години, со што се создава една волшебна атмосфера на еден безвремен наративен простор.
Сатиричните песни на Јежек, кои датираат од истиот период како и архивските снимки, денес звучат поавтентично, поактуелно и поуниверзално од кога било, а ги изведуваат музичари како Kimmo Pohjonen (фински авангарден хармоникаш), легендарната хрватска пејачка Josipa Lisac, македонскиот пост-панк б(р)енд Bernays Propaganda, британскиот рок-маг John Parish, неодоливата Teresa Salgueiro од Madredeus, современата џез икона Тони Китановски со неговиот Черкези караван, па сè до Hugo Race (бившиот член на групата The Bad Seeds на Nick Cave) и неодамна починатите Robert Fisher и Tomaž Pengov, легендарниот словенечки кантавтор.
Саундтракот го продуцираше и миксаше инди-рок иконата Chris Eckman, дизајнот е дело на исклучителниот млад уметник Самир Карахасан, а мастерингот на звучниот носач го направи Петар Дундов.


Јежек имаше обичај да каже: „Ние комичарите, не сме луѓе кои имаат стан на Олимп, ниту викендичка на Парнас или обратно. Нашето место е на дното на падината каде што обичните луѓе се трудат да поминат низ стегите на секојдневниот живот“.
Светот кој што го опишува не се променил многу за овие 50-тина години, сè уште е превртен наопаку и го запознаваме низ музичкото патување кое тргнува од „one man band“ мајсторот на класичната гитара, па сè до оркестар со 60 музичари.

Цената на билетот за филмот е 100 денари, а за тие што ќе го купат винилното ЛП-издание пред проекцијата влезот е слободен. Редовна цена на винилниот 180 грамски ЛП-носач ќе биде 1.500 денари, а на денот на проекцијата ќе се продава по промотивна цена од 1.300 денари со гратис проекција.
Саундтракот е објавен од издавачка куќа PDV Records од Хрватска, која веќе го пушти своето најново издание во продажба во Словенија и Хрватска, а од 11 јуни истото ќе може да се најде и во Македонија во музичката продавница Ап(о)тека при Младинскиот културен центар – Скопје.